अर्जुन प्रधान , अमेरिका
कवि तथा गीतकार दीपा राई पुनको नयाँ गीत ‘कुनै मधुर धून’ को म्युजिक भिडियो सार्वजनिक भएको छ। नेपाली समय अनुसार असोज ३ गते बिहीवार बिहान ८ बजे र अमेरिकी समय अनुसार बुधबार राति १० बजे गीतकार राई पुनको आधिकारिक युट्युब च्यानलमार्फत यो गीतको भिडियो प्रीमियर सार्वजनिक गरिएको हो।
गीतमा मेलिना राईको सुमधुर स्वर सुन्न सकिन्छ भने संगीत संयोजन सचिन सिंहले गरेका छन्। चन्द्र चौधरीले मिक्सिङ गरेको यो गीत अकस्टिक नेपाल स्टुडियोमा रेकर्ड गरिएको हो। म्युजिक भिडियोको निर्देशन निकेश खड्काले गरेका छन्, जसमा दिनेश पराजुलीको छायांकन र विकास पराजुलीको सम्पादन रहेको छ। गीतको रेकर्डिङ राजबाबु चौधरीले गरेका हुन् भने प्रस्तुतिमा गीतकारकी आमा बिमला राईको योगदान रहेको छ।
फर्पिङ र उत्तर बाहिनीका आकर्षक लोकेशनहरूमा छायांकन गरिएको यस गीतको म्युजिक भिडियोमा श्रास र रक्षाले प्रेमिल जोडीको भूमिका निर्वाह गरेका छन्। भिडियोमा प्रेम र समर्पणका भावनात्मक पक्षलाई कलात्मक रूपमा प्रस्तुत गरिएको छ, जसले दर्शकलाई गहिरो भावनात्मक अनुभव प्रदान गर्दछ।
दीपा राई पुन, जो प्रवासमा रहेर नेपाली साहित्य र संगीतमा सक्रिय छिन्, दर्जनौँ गीतहरूमा आफ्ना शब्दहरू समर्पण गरिसकेकी छिन्। यसअघि ‘प्रतिरुप’ गीति एल्बम, ‘तिम्रो सपनाको म’, ‘स्पन्दनका रागहरू’, ‘छुटेको बागदाता’, ‘दीयोको अन्तिम लप्का’, र ‘शरदका पहेंला पातहरू’ जस्ता कृतिहरू सार्वजनिक गरिसकेकी उनले आगामी दिनमा नयाँ खालका गीत र कवितालाई निरन्तरता दिने बताएकी छिन्।
उनका कविता कृतिहरू पनि नेपाली साहित्यमा लोकप्रिय छन्। गीतकार राईले आगामी दिनमा आफ्ना सिर्जनाहरूलाई निरन्तरता दिने बताएकी छिन्।
