वाशिङ्गटन डिसी, अप्रिल २६, २०२६
अप्रिल २५, २०२६ को साँझ, वाशिङ्गटन डिसीको वाशिङ्गटन हिल्टन होटेलमा आयोजित वार्षिक व्हाइट हाउस कर्मचारी सङ्गठन डिनरमा एक सशस्त्र व्यक्तिले सुरक्षा चेकपोइन्टमा आक्रमण गर्दा गोलीकाण्ड भएको छ। राष्ट्रपति डोनाल्ड ट्रम्प, प्रथम महिला मेलानिया ट्रम्प, उपराष्ट्रपति जेडी भ्यान्स र मन्त्रिमण्डलका सदस्यहरूलाई अमेरिकी गोप्य सेवाद्वारा तत्काल सुरक्षित स्थानमा लगिएको छ।
राति करिब आठ बजेर चालीस मिनेटमा बलरूमको मुख्य सुरक्षा जाँच क्षेत्रनजिकै एक सशस्त्र व्यक्ति सुरक्षाकर्मीहरूसँग जुधेको थियो। उसले सुरक्षा चेकपोइन्ट नाघेर भित्र छिर्ने प्रयास गर्यो र कम्तीमा एक गोली चलायो। सुरक्षाकर्मीहरूले तत्काल उसलाई रोकी नियन्त्रणमा लिए।
भित्र करिब दुई हजार छ सय अतिथिहरू खाना खाइरहेका थिए। गोलीको आवाज सुनिनासाथ धेरैजना टेबुलमुनि लुके। केहीले “गड ब्लेस अमेरिका” र “यूएसए” भन्दै नाराहरू लगाए। राष्ट्रपति ट्रम्प मञ्चमाथिको प्रमुख टेबलमा बसिरहेका थिए। गोप्य सेवाका एजेन्टहरूले उनलाई तत्काल घेरी मञ्चबाट बाहिर लैगए।
एक सुरक्षाकर्मी गोली लागेर घाइते भएका छन्, तर उनले बुलेटप्रुफ जाकेट लगाएकाले ज्यान जोगिएको छ। अरू कोही पनि घाइते नभएको अधिकारीहरूले जनाएका छन्। वाशिङ्गटनकी मेयर मुरिएल बाउजरले भनिन् कि यस समयमा जनतालाई कुनै खतरा छैन र थप संलग्नताको कुनै संकेत नदेखिएको बताइन्।
पक्राउ परेको व्यक्तिको पहिचान क्यालिफोर्नियाको लस एन्जलस उपनगर टोरेन्स निवासी ३१ वर्षीय कोल टोमस एलेनको रूपमा भएको छ। एलेनले सन् २०१७ मा क्यालिफोर्निया इन्स्टिच्युट अफ टेक्नोलोजी (क्याल्टेक) बाट मेकानिकल इञ्जिनियरिङमा स्नातक र त्यसपछि क्यालिफोर्निया स्टेटबाट कम्प्युटर साइन्समा स्नातकोत्तर गरेका थिए।
उनले पछिल्लो केही वर्षदेखि सी२ एजुकेसन नामक ट्युसन कम्पनीमा अंशकालीन शिक्षकको रूपमा काम गर्दै आएका थिए। उक्त कम्पनीले उनलाई डिसेम्बर २०२४ मा “महिनाको शिक्षक” को सम्मानसमेत दिएको थियो। एलेन एक स्वतन्त्र भिडियो गेम डेभलपर पनि थिए र “बोर्डम” नामक गेम स्टिम प्लेटफर्ममा बिक्रीका लागि राखेका थिए।
डिसी महानगर प्रहरीका अन्तरिम प्रमुख जेफ्री क्यारलका अनुसार, एलेन घटनाको बेला वाशिङ्गटन हिल्टन होटेलमा नै बस्दै थिए र सोही माध्यमबाट होटेलभित्र प्रवेश गरेका थिए।
अमेरिकी अभियोजक जिनाइन पिरोका अनुसार एलेनमाथि हिंसात्मक अपराधमा हतियार प्रयोग गरेको दुई आरोप र संघीय अधिकारीमाथि खतरनाक हतियारले आक्रमण गरेको एक आरोप लगाइएको छ। पिरोले भनिन् — “यो व्यक्ति जतिसक्दो बढी क्षति पुर्याउने उद्देश्यले आएको स्पष्ट देखिन्छ।” थप आरोप थपिने पनि बताइएको छ।
संघीय चुनाव आयोगको अभिलेख अनुसार, एलेनले अक्टोबर २०२४ मा कमला ह्यारिसको राष्ट्रपति अभियानलाई २५ डलर दान गरेका थिए। तर अहिलेसम्म उनको स्पष्ट अभिप्राय सार्वजनिक भएको छैन।
रातभर एफबीआई एजेन्टहरू टोरेन्समा एलेनसँग जोडिएको घरबाहिर जमा भए। सडकको एक भागमा पुलिस टेप लगाइयो र घरमा स्पटलाइट जलाइयो।
घटनापछि व्हाइट हाउसमा पत्रकार सम्मेलन गर्दै ट्रम्पले आक्रमणकारीलाई “एकल व्यक्ति” भनी वर्णन गर्दै भने कि उसलाई “साहसी गोप्य सेवाका सदस्यहरूले काबूमा लिएका हुन्।” उनले ट्रुथ सोसलमा लेखे — “वाशिङ्गटन डिसीमा कस्तो रात! गोप्य सेवा र कानून प्रवर्तनले अद्भुत काम गरे। उनीहरूले छिटो र साहसपूर्वक कार्य गरे।” ट्रम्पले यो डिनर ३० दिनभित्र पुनः आयोजना गर्ने वाचा पनि गरेका छन्।
भारतीय प्रधानमन्त्री नरेन्द्र मोदी र जापानी प्रधानमन्त्री सानाए ताकाइचीले ट्रम्पको सुरक्षाप्रति राहत व्यक्त गर्दै यस हिंसाको निन्दा गरेका छन्। मोदीले लेखे — “लोकतन्त्रमा हिंसाको कुनै स्थान छैन, यसलाई स्पष्टरूपमा भत्सर्ना गरिनुपर्छ।“
