@अर्जुन प्रधान
ओमाहा, नेब्रास्का – १४ सेप्टेम्बर २०२५
नेब्रास्कास्थित भुटानी कम्युनिटी इन नेब्रास्का (BCN) ले आइतबार नयाँ कार्यसमिति चयन गरेको छ। ओमाहास्थित ग्रेट इभेन्ट्स सेन्टर मा आयोजित कार्यक्रममा निर्वाचन प्रक्रिया सम्पन्न गरी २०२५ को लागि नयाँ नेतृत्व घोषणा गरिएको हो।
निर्वाचन प्रक्रिया
कार्यक्रमको उद्घाटन डा. कुमार गुरुङले स्वागत मन्तव्यसहित गरे। त्यसपछि गोविन मगरले निर्वाचनको प्रक्रिया र उम्मेदवारहरूको नामावली प्रस्तुत गरे। केही पदहरूमा प्रतिस्पर्धा नभएकाले उम्मेदवार स्वतः निर्वाचित भए भने पाँच पदमा मतदान गरिएको थियो। उम्मेदवारहरूले छोटकरीमा आफ्नो विचार प्रस्तुत गरेपछि मतदाता समुदायले मतदानमा भाग लिएका थिए।
निर्वाचन प्रक्रियामा पारदर्शिता कायम गर्न ट्रस्टी र पर्यवेक्षकहरूको टोली खटाइएको थियो। मतदान र मतगणनापछि नतिजा सार्वजनिक गर्दै नयाँ नेतृत्वलाई प्रमाणपत्र तथा BCN को विधि–नियम हस्तान्तरण गरिएको थियो।
नयाँ कार्यसमिति
घोषणाअनुसार २०२५ को लागि निर्वाचित कार्यसमिति यसप्रकार रहेको छः
- अध्यक्ष – बुद्धिमान थापा
- उपाध्यक्ष – चन्द्रकला राई
- महासचिव – प्रेम मंगेर
- कोषाध्यक्ष – अमित (बल्ली) राई
- शिक्षा सचिव – निशान भुजेल
- सांस्कृतिक सचिव – देछु गुरुङ
- प्रेस तथा प्रचार सचिव – गणेश बिश्वा
- खेलकुद सचिव – सन्ता राई
- युवा सचिव – दिनेश कार्की
यसबाहेक, विभिन्न चर्च र सामुदायिक संस्थाबाट परामर्शदाताको रूपमा प्रतिनिधिहरू पनि चयन भएका छन्।
सामुदायिक घोषणा
निर्वाचनको बीचमा समुदायका लागि शरणार्थी विद्यार्थी सहयोग अभियान सुरु गर्ने घोषणा गरिएको थियो। नयाँ नेतृत्वले शिक्षा, सांस्कृतिक गतिविधि र युवाप्रतिभा विकासलाई आगामी प्राथमिकतामा राख्ने संकेत गरेको छ।
विगत अध्यक्षको योगदान
विगत अध्यक्ष भिम गुरुङ २०१४ देखि संस्थाको नेतृत्वमा रहँदा BCN लाई सशक्त बनाउने कार्यमा सक्रिय थिए। गुरुङको कार्यकालमा नेब्रास्कास्थित भुटानी समुदायका लागि भाषा कक्षा, सांस्कृतिक संरक्षण कार्यक्रम, आवास तथा स्वास्थ्य सहयोग, र नयाँ आगन्तुकहरूको पुनर्स्थापनामा महत्वपूर्ण कदम चालिएको थियो।
कार्यक्रमको समापनमा गुरुङले नयाँ टिमलाई बधाई दिंदै “समुदायको एकता नै हाम्रो सबैभन्दा ठूलो शक्ति हो” भन्दै निरन्तर सहकार्यको आवश्यकता औंल्याए।
