१८ जेठ, काठमाडौं । अमेरिकाको भर्जिनियास्थित एक सरकारी भवनमा भएको गोलीकाण्डमा १२ जना मारिएका छन्। घटनामा अन्य छ जना घाइते भएको प्रहरीले जनाएको छ। प्रहरीका अनुसार घटनाका सन्दिग्धको पहिचान भइसकेको छ । संदिग्ध व्यक्ति भर्जिनिया बीच सिटीका कर्मचारी रहेको तथा सरकारी भवनमा ‘अन्धाधुन्ध’ गोली चलाएको प्रहरीले दावि गरेको छ । गोलीकाण्डको जवाफी कारबाहीमा आक्रमणकारी पनि मारिएको प्रहरीले जनाएको छ। सन्दिग्ध व्यक्तिको पहिचान खुलाइसकिएको छैन। घटनामा एक जना प्रहरी पनि घाइते भएका छन्। भर्जिनिया बीच म्युनिसिपल सेन्टरमा स्थानीय समय अनुसार शुक्रवार चार बजेपछि गोली चलेका विवरण आउन थालेका थिए। घटना भएको क्षेत्रमा कैयौँ सरकारी भवन छन् र घटनाबारे प्रकाशमा आएपछि प्रहरीले घेरा हाली कर्मचारीहरूलाई निकालेको बीबीसीले जनाएको छ ।
