२४ असोज, काठमाडौं । टि–ट्वान्टी विश्व कप छनोट अन्तरगत नेपालले आफ्नो अपराजित यात्रा कायमै राखेको छ । लगातार पाचौं जित हात पार्ने क्रममा नेपालले चीनमाथि सहज तथा सानदार जित हारेको छ । चीनले दिएको २७ रनको झिनो चुनौति पछ्याउँदै ब्याटिङ गरेको नेपालले ११ बलमा विना विकेट लक्ष्य पूरा गरेको हो । नेपालका लागि ओपनर विनोद भण्डारीले ८ बलमा २४ रन बनाए । उनले ३ चौका र १ छक्का प्रहार गरे । त्यस्तै, प्रदीप ऐरी ४ रनमा अविजित रहे । यसअघि मलेसियाको मायोमास ओभलमा टस हारेर पहिले ब्याटिङ गरेको चीन नेपालसामु निरिह बन्यो । चीनले १३ ओभरमा २६ रनमा सिमित बनेको थियो । चीनका ३ जना खेलाडीले मात्रै रन बनाए । ७ जना खेलाडी शुन्य रनमै आउट भए । चीनलाई सस्तैमा समेट्ने क्रममा नेपालका सन्दीप लामिछाने, बसन्त रेग्मी र ललितनारायण राजवंशीले समान ३–३ विकेट लिए ।
