१७ असोज, काठमाण्डौ । हेलिकप्टर चढेर फ्रान्सको एउटा जेलबाट भागेको चार महिनापछि कुख्यात अपराधी रिदुअन फइद पुनः पक्राउ परेका छन । फ्रान्समा सर्वाधिक खोजी सूचिमा रहेका फइदलाई प्यारिसको उत्तरतिरबाट उनका भाइ र अन्य दुई व्यक्तिसहित पक्राउ गरिएको फ्रान्सेली प्रहरीले जनाएको छ । ४६ वर्षीय फइद गुन्डाहरूबारे बनाइएका चलचित्रबाट प्रेरित भइ डकैतिमा लागेको बताउँदै अाएका छन ।
सशस्त्र डकैतीको आरोपमा उनलाई सन् १९९८ मा पहिलो चोटि पक्राउ गरिएको थियो। जुलाई १ मा उनी दोस्रो पटक जेलबाट भागेका थिए । दक्षिणपूर्वी प्यारिसस्थित कारागारको आगन्तुक कक्षमा छिरेका तीन सशस्त्र व्यक्तिहरूले उनलाई गत जुलाइ एकमा हेलिकप्टरमा राखेर भगाएका थिए। त्यसका लागि उनीहरूले बन्धक बनाइएका एक उडान प्रशिक्षकलाई बलपूर्वक हेलिकप्टर चलाउन लगाएका थिए।
