२३ भदौ, काठमाण्डौ । साफ च्याम्पियनसिप फूटबल अन्तरगत आज नेपाल र बंगलादेश आमनेसामने हुँदैछन । समुह ए मा रहेका नेपाल, बंगलादेश, पाकिस्तान र भुटानको सेमिफाइनल सम्भावना कायमै रहेकाले अघिल्लो चरण प्रवेशको समिकरण भने रोचक बनेको छ । यद्यपी लगातार दुई खेल जितेको आयोजक बंगलादेश तुलानात्मक रुपमा नेपाल, पाकिस्तान र भुटान भन्दा सहज अवस्थामा छ । बंगालादेशलाई आजको खेलमा बराबरी नै सेमिफाइनल प्रवेशका लागि काफि छ भने नेपालका लागि अघिल्ला चरण प्रवेश भने भुटान र पाकिस्तानको खेलमा पनि निर्भर हुने अवस्था छ । नेपालले जितेको खण्डमा भने सहजरुपमा दोस्रो चरण प्रवेश गर्ने देखिन्छ । बंगलादेश र नेपाल खेल्नुअघि पाकिस्तान र भुटानबीच प्रतिस्पर्धा हुनेछ। यदि उक्त खेलमा पाकिस्तानले भुटानलाई हराएमा नेपालले बंगलादेशलाई कुनै पनि हालतमा हराउनैपर्ने बाध्यता हुनेछ। तर, भुटानले पाकिस्तानलाई हराएको खण्डमा नेपालले बंगलादेशसँग बराबरी खेले पनि अघिल्लो चरण पुग्नेछ।
