२२ भदौ, काठमाण्डौ । प्रधानमन्त्री केपी शर्मा ओलीले १५ औँ निजामती सेवा दिवसका अवसरमा शुभकामना दिँदै जनताले अनुभूती गर्ने गरीको काम गर्न राष्ट्रसेवक कर्मचारीहरुलाई आह्वान गर्नुभएको छ । एक्काइसौं शताब्दीमा नागरिकका अपेक्षा सम्बोधनका लागि घरदैलोमा गुणस्तरीय सेवा प्रवाहको सुनिश्चितता गर्न प्रधानमन्त्री ओलीले राष्ट्रसेवकहरुमा आह्वान गर्नुभएको हो । सम्पूर्ण निजामती राष्ट्रसेवकको सुस्वास्थ्य तथा पेशागत अभिवृद्धिका लागि शुभकामना व्यक्त गर्दै उहाँले बृहत् कार्यक्षेत्र, नागरिक दायित्व एवं जिम्मेवारीसहितको सार्वजनिक सेवा नै निजामती सेवा भएको उल्लेख गर्नुभयो । सरकार र जनताबीच सम्बन्ध सुमधुर बनाउन यसको अहम् भूमिका रहँदै आएको चर्चा गर्दै प्रधानमन्त्री ओलीले राज्यका नीति तथा योजना, कानूनको तर्जुमा र कार्यान्वयन गराउने महत्वपूर्ण भूमिका निजामती सेवाले नै निर्वाह गर्दै आएको जनाउनुभयो । यो बर्षको निजामती सेवा दिवस ‘नतिजामुखी प्रशासनः समृद्धि र सुशासन’ भन्ने नाराका साथ मनाइदैछ । दिवसका अवसरमा सरकारले उत्कृष्ट कर्मचारीलाई पुरस्कृत गर्दै आएपनि २ बर्षदेखि यो प्रकिया रोकिदै आएको छ ।
