काठमाडौं — देशको राजनीतिक अन्योलका बीच संवादको सकारात्मक संकेत देखिएको छ। राष्ट्रपति रामचन्द्र पौडेलको पहलमा अन्तरिम सरकारकी प्रधानमन्त्री सुशीला कार्की र प्रमुख तीन दलका शीर्ष नेताबीच शीतल निवासमा भेटवार्ता भएको छ।
राष्ट्रपतिको आह्वानमा प्रधानमन्त्री कार्की, नेपाली कांग्रेसका सभापति शेरबहादुर देउवा, एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ सहभागी छलफलमा समसामयिक राजनीतिक अवस्था, निर्वाचनको तयारी र संवैधानिक निकासबारे विचार–विमर्श भएको जनाइएको छ।
लामो समयदेखि हुन नसकेको शीर्ष तहको संवाद पुनः सुरु हुनु लोकतान्त्रिक अभ्यासका लागि सकारात्मक मानिएको छ। राजनीतिक दलहरूबीच सहकार्य र समझदारीको वातावरण निर्माण गर्ने उद्देश्यले भएको यो भेटले राजनीतिक स्थायित्वतर्फ आशा जगाएको छ।
राष्ट्रपति पौडेलको सक्रिय पहलले संवादको ढोका खुलाएको भन्दै राजनीतिक वृत्तमा यस भेटलाई समाधानमुखी प्रयासका रूपमा हेरिएको छ।
