@अर्जुन प्रधान
नेपाली संगीत र संस्कृतिको संरक्षणमा अग्रसर भूटानी अमेरिकी म्युजिक एशोसिएसन (BAMA) ले दुईवटा महत्वपूर्ण योजना सार्वजनिक गरेको छ। संस्थाले आफ्नै थिम गीत निर्माण सुरु गर्ने घोषणा गरेको छ भने विभिन्न परियोजनाहरूलाई सहकार्यात्मक मोडलमार्फत अघि बढाउने निर्णय गरेको हो।
BAMA का अध्यक्ष विश्वज गुरुङका अनुसार थिम गीत निर्माण कार्यलाई सबैको सहभागितामूलक बनाउन चार चरणमा सम्पन्न गरिनेछ।
• पहिलो चरणमा इच्छुक गीतकारहरूबाट गीत संकलन गरिनेछ।
• दोस्रो चरणमा संगीतकारहरूले आफ्ना धुन पठाउने व्यवस्था हुनेछ।
• तेस्रो चरणमा छनोट भएको गीत र धुनलाई संगीत संयोजनमार्फत आकर्षक बनाइनेछ।
• अन्तिम चरणमा भने विभिन्न गायक/गायिकाहरूलाई सामूहिक रूपमा रेकर्डिङमा सहभागी गराइनेछ।
थप रूपमा, थिम गीतको संगीत भिडियो निर्माण गर्ने र छोटकरीमा जिङल वा इन्ट्रो संस्करण निकाल्ने सम्भावना पनि रहेको एशोसिएसनले जनाएको छ।
थिम गीतसँगै, BAMA ले आफ्नो कार्यशैलीलाई अझ प्रभावकारी बनाउन सहकार्यमा आधारित मोडल लागू गर्ने घोषणा गरेको छ।
यस अन्तर्गत व्यक्तिगत, संस्थागत वा व्यावसायिक साझेदारहरूले BAMA को दृष्टि र मिशनसँग मेल खाने परियोजनामा हातेमालो गर्न सक्नेछन्। साझेदारीलाई औपचारिक बनाउन सम्झौता पत्र (MOU) वा करारपत्र गरिनेछ भने हरेक परियोजनामा BAMA का बोर्ड वा सल्लाहकार सदस्यहरूको प्रत्यक्ष संलग्नता रहनेछ।
साझेदारीका सम्भावित क्षेत्रहरूमा BAMA म्युजिक एकेडेमी, मर्चेन्डाइज स्टोर, रियालिटी शो, नृत्य प्रतियोगिता, युट्युब च्यानल, अवार्ड समारोह, वाद्यवादन बिक्री लगायतका सांगीतिक र सांस्कृतिक पहलहरू समावेश छन्।
BAMA का पदाधिकारीहरूका अनुसार यो मोडलले संस्थालाई दीर्घकालीन रूपमा आर्थिक सबलीकरण गर्नेछ। बोर्ड सदस्यहरू स्वयंसेवी आधारमा कार्यरत भएकाले सहकार्यात्मक मोडलले जिम्मेवारी बाँडफाँड गर्न मद्दत गर्ने र संस्थालाई अझ मजबुत र प्रगतिशील बनाउने विश्वास गरिएको छ।
“हाम्रो उद्देश्य नेपाली संगीतलाई जगेर्ना गर्दै नयाँ पुस्तासम्म पुर्याउनु हो। थिम गीत निर्माणमा सामूहिक सहभागिता र सहकार्यात्मक मोडलमार्फत हामी सबैलाई यस अभियानमा जोड्न चाहन्छौं,” BAMA का अध्यक्ष विश्वज गुरुङले बताएका छन्।
संस्थाले इच्छुक गीतकार, संगीतकार, गायक/गायिका तथा सम्भावित साझेदारहरूलाई यस अभियानमा सहभागी हुन आमन्त्रण गरेको छ। BAMA ले यसलाई नेपाली संगीत र संस्कृतिलाई नयाँ पुस्तामा पुर्याउने ऐतिहासिक अवसरको रूपमा व्याख्या गरेको छ।
