नेपाली सांगीतिक साँझ: अमेरिकामा हुने नेपाली भाषी भूटानीहरूको सांगीतिक कार्यक्रमको तयारी पूरा 

अर्जुन प्रधान /अमेरिका – 

नेपाली भाषा, कला र सांगीतिक सम्पदाको प्रवर्द्धनका लागि अमेरिका निवासी नेपाली भाषी भूटानी कलाकारहरूको सक्रियतामा एक विशेष सांगीतिक साँझको आयोजना हुन लागेको छ। कार्यक्रममार्फत नेपाली मौलिक वाद्ययन्त्रहरू र परम्परागत र आधुनिक गीतहरू प्रस्तुत गरिने आयोजकले जनाएका छन्।

आगामी आइतबार साँझ सम्पन्न हुने यस सांगीतिक कार्यक्रममा अमेरिका निवासी चर्चित संगीतकर्मीहरूको आकर्षक प्रस्तुति रहनेछ। बाँसुरीमा हेम तामाङ र भीम गजमेर, सरंगीमा भरत तामाङ, गितारमा बिजय राई, बेस गितारमा हरीश गजमेर, तबलामा चन्द्र कार्की, मदन लियोम रसाइली र इन्द्र लामिछाने, तथा ड्रम/अक्टापेडमा सुशील रसाइली को बेजोड प्रस्तुति रहने कार्यक्रम संयोजक गणेश गजमेर ले जानकारी दिएका छन्।

BAMA का अध्यक्ष बिस्वज गुरुङका अनुसार, “यो कार्यक्रम प्रवासी भूमिमा जन्मिएका नयाँ पुस्तालाई नेपाली संगीत र संस्कृति नजिक ल्याउने प्रयास हो। नेपाली मौलिकता बोकेको संगीतको संरक्षण र प्रचार प्रसार गर्दै अग्रजलाई सम्मान र अनुजलाई प्रोत्साहन गर्ने हाम्रो उद्देश्य हो।”

सांगीतिक साँझमा आधुनिक, लोक र गजल विधाका गीतहरू प्रस्तुत गरिनेछ। साथै, विभिन्न वाद्ययन्त्रहरू मार्फत नेपाली धुनहरूको विविधता प्रस्तुत गरिनेछ। कार्यक्रम स्थल, समय र अन्य व्यवस्थापकीय तयारीहरू अन्तिम चरणमा पुगेको आयोजकले बताएका छन्।

१७ वटा विविध सांगीतिक प्रस्तुतिहरू, जसमा नेपाली गीतहरूका साथसाथै मौलिक सिर्जनाहरू पनि समावेश छन्। कार्यक्रममा सहभागिता जनाउने कलाकारहरूमध्ये किरण गजमेर, अनुइया तामाङ, अमिर गजमेर, क्यासी तामाङ, दिक्षान्त गुरुङ, पुस्पा गजमेर, नरेश खरेल, रेजिना सुब्बा लगायतको प्रस्तुति रहनेछ।

सांस्कृतिक जागरण र आपसी एकता अभिवृद्धिका लागि महत्वपूर्ण मानिएको यस कार्यक्रमले अमेरिका र अन्या मुलुकमा पुनर्वाश भएका  नेपाली भाषी भूटानी कलाकार तथा समुदायलाई एकैथलोमा ल्याउने गुरुङको कार्यकालमा अपेक्षा गरिएको छ।

कार्यक्रममा सहभागिताका लागि इच्छुक दर्शकहरूलाई समयमै आफ्नो स्थान सुरक्षित गर्न अपिल गरिएको छ।उक्त कार्यक्रम प्रवेश निशुल्क रहेको आयोजकले जानकारी दिएको छ । सम्पूर्ण भूटानी-नेपाली समुदाय, साथ साथै अन्तर्राष्ट्रिय संगीतप्रेमीहरूलाई यो सांस्कृतिक उत्सवमा सहभागी हुन हार्दिक आमन्त्रण गरिएको छ । साथै यो एउटा यस्तो अवसर हो जहाँ बालबालिका, युवायुवती, बृद्धबृद्धा सबैले आ–आफ्नो योगदान र आनन्द सँगै लिन सक्ने वातावरण मिलाएको आयोजकको भनाइ छ । 

कार्यक्रम तालिका

शुक्रबार, अगस्त ८, २०२५

कार्यक्रम: कलाकार, प्रायोजक तथा अतिथिहरूसँग भेटघाट (Meet & Greet)

समय: साँझ ७:०० बजे

स्थान: 2122 Brownsville Rd, Pittsburgh, PA 15210

शनिबार, अगस्त ९, २०२५

कार्यक्रम: BAMA वार्षिक सांस्कृतिक कार्यक्रम

समय: साँझ ५:०० बजे ढोका खुल्ने | कार्यक्रम: साँझ ६:००–८:३० बजे

स्थान: August Wilson African American Cultural Center, 980 Liberty Avenue, Pittsburgh, PA

अतिथिका लागि थप यात्रा र पार्किङको जानकारी

• सार्वजनिक यातायात: Port Authority बसहरू र लाइट रेल सेवा उपलब्ध।
• पार्किङ स्थानहरू: Westin Pittsburgh, David L. Convention Center, Grant Street Transportation Center आदि।
• रियल-टाइम पार्किङ सूचना: ParkPGH वेबसाइट वा मोबाइल एपमा उपलब्ध।
• ह्वीलचेयर पहुँच: कार्यक्रम स्थल पूर्ण रूपमा पहुँच योग्य छ।