२४ फागुन, काठमाण्डौं । आइसीसी विश्वकप छनोटमा नेपालले लगातार दोस्रो हार बेहोरेको छ। दोस्रो खेलमा नेपाल स्कटल्याण्डसँग ४ विकेटले पराजित भएको हो। नेपालले दिएको १ सय ४९ रनको लक्ष्य स्कटल्याण्डले ४१.३ ओभरमा ६ विकेट गुमाएर भेटाएको हो । स्कटल्याण्डका कप्तान कोयल कोइजरले नटआउट ८८ रनको पारी खेल्दै आफ्नो टिमलाई जित दिलाएका हुन् । नेपालका बसन्त रेग्मी र सन्दीप लामिछानले समान २ तथा दीपेन्द्र ऐरी र ललित राजबंशीले समान १ विकेट लिएका थिए। त्यसअघि टस जितेर पहिले ब्याटिङ गरेको नेपालले ४७.४ ओभरमा सवै विकेट गुमाएर १ सय ४९ रनमा समेटिएको थियो । कप्तान पारस खड्काले अर्धशतकीय पारी खेल्दै नेपालको खस्किसकेको स्कोरलाई केही माथि पुर्याए पनि यो नै जितका लागि पर्याप्त हुन सकेन । छनोटको पहिलो खेलमा आयोजक जिम्बावेसँग पराजित भएको नेपालले लगातार दोस्रो खेलमा पनि हार बेहोरेपछि भने छनौटको सम्भावना कठिन भएको छ । सुपरसिक्सको शीर्ष दुर्इमा रहने टोलीले सन् २०१९ को विश्वकपमा स्थान पाउँनेछन्।
