@अर्जुन प्रधान /अमेरिका – अन्तर्राष्ट्रियस्तरमा नेपाली फिल्मको प्रतिष्ठानको रूपमा स्थापित ८औँ एटीए एभरेष्ट ग्लोबल नेपाली फिल्म अवार्ड २०२५ को मिति परिवर्तन गरिएको छ। अब यो बहुप्रतीक्षित अवार्ड समारोह नोभेम्बर १५, २०२५ मा अमेरिकाको कोलोरोडो राज्यको बोल्डर शहरमा हुने पक्का भएको छ।
पहिले अगस्ट ९, २०२५ मा आयोजना हुने भनिएको उक्त कार्यक्रमको मिति आयोजक समितिले पुनःनिर्धारण गर्दै, सोमवार सार्वजनिक सूचना जारी गरेर सबै सहभागि, अतिथि, सरोकारवाला तथा शुभेच्छुकहरूलाई जानकारी गराएको हो।
कार्यक्रमको मिति परिवर्तन गर्नुको प्रमुख उद्देश्य भनेको अन्तर्राष्ट्रिय फिल्मकर्मीहरूको समयतालिकासँग मेल मिलाउने, विश्वभर रहेका नेपाली समुदायको सक्रिय सहभागिता सुनिश्चित गर्ने, र समग्रमा कार्यक्रमलाई थप समावेशी, प्रभावशाली र भव्य बनाउने रहेको आयोजक समितिले स्पष्ट पारेको छ।
समितिका अनुसार, सहभागीहरूको उपस्थिति सहज बनाउने तथा कार्यक्रमलाई विश्वव्यापी नेपाली समुदायको साझा चाडको रूपमा प्रस्तुत गर्ने लक्ष्यसहित मिति परिवर्तन गरिएको हो।
मिति परिवर्तनले केही असहजता सिर्जना गर्न सक्ने सम्भावनालाई ध्यानमा राख्दै आयोजक समितिले सबैको निरन्तर साथ, बुझाइ र उत्साहप्रति आभार व्यक्त गर्दै क्षमायाचना पनि प्रकट गरेको छ।
“यो अवार्ड नेपाली फिल्म उद्योगको अन्तर्राष्ट्रिय परिचय बनाउने माध्यम मात्र होइन, नेपाली कला र संस्कृति प्रति गर्व गर्नेअवसर पनि हो,” अध्यक्ष कलाकार नवराज श्रेष्ठले जानकारी दिनुभएको छ ।
आगामी दिनहरूमा अवार्डसम्बन्धी थप विवरणहरू, कार्यक्रमको कार्यसूची र सहभागी नामावलीहरू आयोजकको आधिकारिक वेबसाइट तथा सामाजिक सञ्जालमार्फत सार्वजनिक गरिने बताइएको छ।
यो अवार्डले नेपाली चलचित्रको अन्तर्राष्ट्रिय प्रवर्द्धन र नेपाली कलाकारहरूको ग्लोबल सञ्जाल विस्तारमा ठूलो योगदान दिने विश्वास लिइएको छ।
८औँ एटीए एभरेष्ट ग्लोबल नेपाली फिल्म अवार्ड २०२५ ले हरेक वर्ष उत्कृष्ट नेपाली फिल्म, निर्देशक, कलाकार, संगीतकारलगायत विभिन्न विधामा योगदान पुर्याउने सर्जकलाई सम्मान गर्दै आएको छ। यो वर्षको कार्यक्रमले पनि विश्वभरिका नेपाली फिल्म पारखीहरूको ध्यान तान्ने निश्चित देखिन्छ।
