काठमाडौं । कतिपय मतदान केन्द्र बाहेक मुलुकभर आइतबार सम्पन्न प्रतिनिधिसभा र प्रदेश सभाको निर्वाचनमा ६१ प्रतिशत मत खसेको निर्वाचन आयोगले प्रारम्भिक प्रक्षेपण गरेको छ । आयोगलाई प्राप्त विवरण अनुसार ६१ प्रतिशत मत खसेको आयोगले जनाएकाे छ ।
प्रमुख निर्वाचन आयुक्त दिनेश थपलियाले कतिपय ठाउँको एकिन संख्या आइनसकेकाले केहि संख्या बढ्ने सक्ने बताए ।
यसअघि २०७४ सालको निर्वाचनमा ६८ प्रतिशत भोट खसेको थियो । त्यसको तुलनामा अहिलेको मतदान ८ प्रतिशत न्यून हो । यसले मतदाताहरू चुनावमा भोट हाल्न निरुत्साहित बन्दै गएको देखिएको छ ।
ती अधिकारीले भने, ‘हामी हिसाब किताब गरिरहेका रहेको छौ । प्राप्त प्रारम्भिक तथ्याङ्क अनुसार ६० प्रतिशत मत खसेको छ ।’
आयोगका अनुसार देशभरका १५ मतदान स्थलको मतदान स्थगित भएको छ । सुर्खेत, नवलपरासी पूर्व, बाजुरा र गुल्मीका १५ केन्द्रमा मतदान स्थगित भएको हो । विभिन्न विवादपछि ती स्थानको मतदान स्थगित भएको हाे।
निर्वाचन आयोगले आज रद्द भएको मतदान केन्द्रमा २ दिनभित्र मतदान गर्न निर्देशन दिएको छ । आइतबार निर्वाचन सम्पन्न भएपछि पत्रकार सम्मेलन गर्दै आयोगले मुख्य निर्वाचन अधिकृत र निर्वाचन अधिकृतहरूलाई यस्तो निर्देशन दिएको हो ।
आयोगले आवश्यक तयारी गरेर २ दिनभित्र मतदान गराउन निर्देशन दिएको छ ।
