४ कात्तिक,काठमाण्डौ । दुर्गाको मूर्ति विर्सजनका बिषयको विवादले उग्ररुप लिएपछि कपिलबस्तुको कृष्णनगरमा आइतबार साँझदेखि अनिश्चितकालीन कर्फ्यू आदेश जारी गरिएको छ । कृष्णनगर बजारभित्र नवरात्रभर पूजा गरिएका मूर्तिलाई विसर्जन गर्न लैजाने क्रममा शनिबारदेखि सुरु भएको विवादले आइतबार उग्र रुप लिएपछि साँझ ५ बजेदेखि अनिश्चिकालीन कर्फ्यू जारी गरिएको स्थानीय प्रशासनले जानकारी दिएको छ । स्थानीय हिन्दु समुदाय र मुस्लिम समुदायबीच विवाद बढ्दै गएपछि जिल्ला प्रशासन कार्यालय कपिलवस्तुले आइतबार साँझ ५ बजेदेखि कर्फ्यू लगाएको छ । प्रमुख जिल्ला अधिकारी अर्जुनप्रसाद पोखरेलका अनुसार भारतीय सीमा क्षेत्रको बजार कृष्णनगर क्षेत्रमा दक्षिणतर्फ नेपाल–भारत दशगजा, उत्तरतर्फ कृष्णनगर–१ शिवानगरको बढाया पोखरीक्षेत्र, पूर्व सेमरा गाउँ र पश्चिम सिर्सिहवा चोकसम्म कर्फ्यू लगाइएको छ । कर्फ्यूको समयमा कसैलाई पनि घर बाहिर निस्कन, आवत जावत गर्न, भेला हुन, जुलुस निकाल्न तथा हुलदंगा गर्न रोक लगाइएको छ ।
