२४ असोज, काठमाडौं । नेपालीहरुको महत्वपुर्ण चाड बडा दशैं सुरु भएको छ । दशैंको पहिलो दिन बुधबार घरघरमा घटस्थापना गरिएको छ । शुद्ध माटो तथा गोबरले घर शुद्ध बनाएर शास्त्रीय विधि अनुसार शुभ मुहूर्तमा घडा स्थापना गरी घडाको नजिक सप्तधान्य (जमरा) बीजारोपण गरी नौ दिनसम्म विभिन्न नामले शक्तिको पूजा आराधना गरिन्छ । हनुमानढोकास्थित दशैं घरमा पनि जमरा राखिएको छ । त्यसक्रममा गुरूजुको पल्टनले सलामी दिएको थियो ।प्रसिद्ध तलेजु भवानीको मन्दिरमा पनि विधिवत रूपमा बडा दसैं सुरु भएको छ । बुधबार बिहान ७ बजेर १५ मिनेटमा पाञ्चाङ्ग निर्णायक समितिले दिएको शुभसाइतमा जोशी, कर्माचार्य र राजोपाध्याय पुजारीहरुले तलेजुमा जमरा राखेर दसैं सुरु भएको हो ।
