अर्जुन प्रधान
फूल छन्।
मैनबत्ती छन्।
कार्डहरू छन्।
र ती सबैले
एउटा कुरा खोजिरहेका छन् या भनिरहेका छन्
सन्ती राम असल मान्छे थिए।
सेाउथइस्ट पोर्टल्यान्डस्थित 3D’s Market अगाडि बनाइएको स्मृति स्थल दिनदिनै बढ्दै गएको छ। फूल, मैनबत्ती र सन्देश कार्डहरूले एक व्यक्तिको सम्झनालाई जीवित राखेका छन्—सन्ती राम राई।
३३ वर्षीय सन्ती राम राईको यही स्टोरमा काम गरिरहेका बेला गोली हानी हत्या गरिएको थियो। डिसेम्बर ९, २०२५ को साँझ करिब ५:२० बजे हतियारधारी समूह स्टोरभित्र प्रवेश गरी लुटपाट गरेको र त्यसक्रममा सन्ती राईलाई छातीमा गोली हानेको प्रहरीले जनाएको छ। घटनास्थलमै उनको मृत्यु भएको थियो। आक्रमणपछि संलग्न व्यक्ति वा व्यक्तिहरू फरार भएका छन्।
ओरेगन किरात सोसाइटीका सदस्य रहेका सन्ती राई परिवारको जीविकोपार्जनका लागि उक्त स्टोरमा काम गर्दै आएका थिए। घटनापछि परिवार, साथीभाइ र स्थानीय नेपाली समुदायले गहिरो शोक व्यक्त गरेका छन् र दोषी पहिचान गरी कारबाही गर्न माग गरेका छन्।
परिवारकी नजिककी साथी रेखा कोइरालाले स्थानीय टेलिभिजनसँग कुरा गर्दै भनिन्, “हामी अझै पनि यो घटनालाई स्वीकार गर्न सकेका छैनौं। उहाँ मेरा लागि दाजुभाइ जस्तै हुनुहुन्थ्यो।”
पोर्टल्यान्ड प्रहरी ब्यूरो (PPB) का अनुसार घटना सम्बन्धी अनुसन्धान जारी छ, तर हालसम्म कुनै शंकास्पद व्यक्ति सार्वजनिक गरिएको छैन। प्रहरीले घटनाबारे जानकारी भएका जो–कोहीलाई अगाडि आउन आग्रह गरेको छ।
सन्ती राई पछाडि एक श्रीमती र दुई साना बालबालिका छोडेर गएका छन्। घरको एकमात्र कमाउने सदस्यको मृत्यु भएपछि परिवारको आर्थिक अवस्था कठिन बनेको छ। यही कारण परिवारलाई सहयोग गर्न फन्डरेजर सुरु गरिएको छ, जसमा समुदायले व्यापक समर्थन जनाइरहेको छ।
सन् २०११ मा अमेरिका आएका सन्ती राई नेपाली समुदायमा सहयोगी व्यक्तिका रूपमा चिनिन्थे। अंग्रेजी भाषामा समस्या भएका व्यक्तिहरूलाई सहयोग गर्नु, कागजी प्रक्रियामा साथ दिनु र समुदायका गतिविधिमा सक्रिय रहनु उनको दैनिक जीवनको हिस्सा थियो।
उनको सपना एक दिन आफ्नै सुविधा स्टोर खोल्ने थियो। आज त्यो सपना उनी काम गर्ने स्टोर अगाडि बनेको स्मृति स्थलमा मौन रूपमा सम्झनामा मात्र बाँकी छ।
यो घटना अझै सक्रिय अनुसन्धानको विषय बनेको छ।
न्याय ढिलो हुन सक्ने भए पनि, सत्य बाहिर आउनै पर्ने माग परिवार र समुदायले दोहोर्याइरहेका छन्।
सन्ती राई फर्केर आउँदैनन्।
तर सत्य बाहिर आउनै पर्छ।
न्याय हुनै पर्छ।
यदि तपाईंलाई यो घटनाबारे , कुनै पनि जानकारी छ भने
कृपया अगाडि आउनुहोस्।
आज सन्तीका लागि,
भोलि अरू कसैका लागि।
