नेपाली भाषा, साहित्य र संस्कृतिलाई अन्तर्राष्ट्रिय मञ्चमा प्रवर्द्धन गर्ने उद्देश्यसहित छैठौं अन्तर्राष्ट्रिय सिर्जनात्मक सम्मेलन (GICC VI) आगामी जुन १३ देखि १५ सम्म नेदरल्यान्ड्सको द हेग शहरमा आयोजना हुँदैछ।
यस सम्मेलनका अध्यक्ष डीपी शर्मा मैनाली नेपाली मूलका डच नागरिक हुन्। २७ वर्षदेखि शिक्षा क्षेत्रमा समर्पित मैनाली हाल नेदरल्यान्ड्सको द हेग विश्वविद्यालय (The Hague University of Applied Sciences) मा सह-प्राध्यापक तथा डेल्फ्ट प्रविधि विश्वविद्यालय (Delft University of Technology) मा प्राध्यापन र अनुसन्धानमा सक्रिय छन्।
उनी शिक्षा मार्फत सामाजिक परिवर्तनको शक्तिमा विश्वास गर्छन् र विश्वव्यापी मुद्दाहरूमा सक्रिय मानव अधिकार अभियन्तापनि हुन्। साथै, नेपाल, नेपाली साहित्य, संगीत र पूर्वी दर्शनमा कलम चलाउने साहित्यकार हुन्। उनी नेदरल्यान्ड्सको नेपाली भाषी इन्जिनियरहरूको सङ्घका संस्थापक अध्यक्ष र हाल संरक्षकको भूमिकामा सक्रिय छन् । अन्तर्राष्ट्रिय नेपाली कलाकार समाजको विश्व सञ्जालका सल्लाहकार पनि हुन्।
ग्लोबलपोस्टका सम्पादक अर्जुन प्रधानले सम्मेलनको उद्देश्य, तयारी र भावी दृष्टिकोणबारे डीपी शर्मा मैनालीसँग विशेष कुराकानी गरेका छन्। प्रस्तुत छ सोही अन्तरर्वार्ताको सम्पादित अंश:
अर्जुन प्रधान (अ.प.):
सर्वप्रथम, तपाईं आफैंको परिचय दिनुहोस्।
डीपी शर्मा मैनाली (डी.श.म.):
म डीपी शर्मा मैनाली, नेपाली मूलको डच नागरिक हुँ। भूटानमा जन्मिएको, हाल नेदरल्यान्ड्समा अध्यापन र अनुसन्धानमा कार्यरत छु। शिक्षा र समाज सेवा मेरो जीवनको अभिन्न हिस्सा हो।
अ.प.:
GICC VI अन्य सम्मेलनहरूभन्दा विशेष के बनाउँछ?
डी.श.म.:
GICC VI केवल सम्मेलन होइन, एउटा आन्दोलन हो। यो “शान्ति, प्रगति र समृद्धि (Peace, Progress, Prosperity)” को सन्देशसँगै नेपाली भाषा, साहित्य र संस्कृतिलाई अन्तर्राष्ट्रिय मञ्चमा पुर्याउने अभियान हो। नेपाली पहिचानलाई विश्वसामु उजागर गर्ने यो एक अनौठो अवसर हो।
अन्तरपुस्तीय संवाद र युवा पुस्ताको सशक्तिकरण
अ.प.:
नेपाली समुदायका विभिन्न पुस्तालाई कसरी एकै मञ्चमा ल्याउन लागिएको छ?
डी.श.म.:
GICC VI ले पहिलो पुस्तादेखि तेस्रो पुस्तासम्मका नेपालीहरूलाई एउटै साझा मञ्च दिन्छ। यहाँ सिर्जनात्मकता, विज्ञान, दर्शन र सामाजिक समावेशीताको अद्वितीय संगम प्रस्तुत हुनेछ। यसरी पुस्तान्तरण र अनुभव आदानप्रदान सशक्त बन्नेछ।
अ.प.:
युवा पुस्तालाई सम्मेलनले कसरी प्रेरित गर्ने अपेक्षा गरिएको छ?
डी.श.म.:
“स्वीकारोक्ति” दर्शन अन्तर्गत निबन्ध लेखन (Essay Writing) प्रतियोगिता लगायतका कार्यक्रममार्फत युवामा आत्म-स्वीकृति, सहिष्णुता र सकारात्मक सोच विकास गरिनेछ। उत्कृष्ट बालप्रतिभाहरूलाई विशेष सत्रमा वक्ता (Panelist) का रूपमा प्रस्तुत गरिनेछ।
विज्ञान र दर्शनको संयोजन
अ.प.:
Science & Philosophy Conference किन थपिएको हो?
डी.श.म.:
समाजको समग्र विकासका लागि वैज्ञानिक सोच र साहित्यिक चेतना सँगसँगै हुनु जरुरी छ। विज्ञानले यथार्थमा उभ्याउँछ भने साहित्यले मानवीय चेतना फैलाउँछ। यी दुईबीच सन्तुलित सहकार्य स्थापित गर्ने प्रयास हो यो सम्मेलन।
अन्तर्राष्ट्रिय सहभागिता र सहकार्य
अ.प.:
अन्तर्राष्ट्रिय सहभागिता कत्तिको उत्साहजनक छ?
डी.श.म.:
१६ देशका लेखक, कलाकार र बौद्धिक व्यक्तिहरूको सहभागिता अपेक्षित छ। संख्याभन्दा गुणस्तरमा ध्यान दिइएको छ। TU Delft, The Hague University र ASAN Netherlands जस्ता संस्थासँग सहकार्यले सम्मेलनलाई अझ सशक्त बनाएको छ।
अ.प.:
गैर-नेपाली समुदायलाई कसरी समेट्ने प्रयास भइरहेको छ?
डी.श.म.:
हामी आवासीय वा गैर-आवासीय भन्ने छुट्याउँदैनौं। नेपाली मूलका सबैलाई समान रूपमा आमन्त्रण गरिएको छ। साझा पहिचान जोगाउनका लागि यो एकता अपरिहार्य छ।
चुनौती र अवसर
अ.प.:
नेपाली साहित्य र संस्कृतिलाई अन्तर्राष्ट्रिय स्तरमा फैलाउन मुख्य चुनौती के छन्?
डी.श.म.:
भाषिक विविधता, स्रोतको अभाव र प्रवासी पुस्तामा चासोको कमी मुख्य चुनौती हुन्। तर डिजिटल प्रविधिको प्रयोग र अन्तर्राष्ट्रिय सहकार्य मार्फत यी चुनौतीहरूलाई अवसरमा बदल्न सकिन्छ।
व्यक्तिगत प्रेरणा र सन्देश
अ.प.:
तपाईंलाई यो अभियानमा लाग्न प्रेरणा के हो?
डी.श.म.:
नेपाली भाषा, साहित्य र संस्कृतिप्रति गहिरो माया छ। प्रवासी पुस्तामा यसको संरक्षण र प्रवर्द्धन गर्नु मेरो लागि दायित्व हो। हामीले आज जे पाइरहेका छौं, त्यो हिजोका पुस्ताले आफ्नो पहिचान बचाएर अगाडि बढेकै कारण सम्भव भएको हो।
अ.प.:
युवाहरूप्रति के सन्देश दिन चाहनुहुन्छ?
डी.श.म.:
प्रिय युवा साथीहरू, आत्म-स्वीकृति, सहिष्णुता र इमानदारी सँग अघि बढ्नुहोस्। फरक हुनु सामान्य कुरा हो। सकारात्मक सोच राख्दै सही कुराका लागि आवाज उठाउनुहोस्। “Be Real, Be Kind, Be You” भन्ने मूलमन्त्रलाई आत्मसात् गर्नुहोस्।
अ.प.:
भविष्यमा GICC लाई कस्तो रूपमा विकास गर्न चाहनुहुन्छ?
डी.श.म.:
GICC लाई अन्तर्राष्ट्रिय सिर्जनात्मक आन्दोलन को रूपमा विकसित गर्ने चाहना छ — जहाँ भाषा, विज्ञान, दर्शन र मानवता एउटै यात्रामा अघि बढून्। म सधैं सकारात्मक र रचनात्मक काममा सहयोग गर्न तत्पर छु।
अ.प.:
धन्यवाद डीपी शर्मा मैनाली सर। ग्लोबलपोस्टका तर्फबाट तपाईंलाई आगामी सम्मेलनका लागि शुभकामना।
डी.श.म.:
धन्यवाद अर्जुनजी। म तपाईंहरू सबैलाई द हेग, नेदरल्यान्ड्स मा आयोजना हुने यस सम्मेलनमा हार्दिक निमन्त्रणा दिन चाहन्छु।
© ग्लोबलपोस्ट
अर्जुन प्रधान
