अर्जुन प्रधान
नेपाली कलाकार तथा फिटनेस आइकन कबिता नेपालीले २०८२ साल जेठ ५ गते बिहान ९:३३ बजे सगरमाथा (८८४८.८६ मि) र त्यसको भोलिपल्ट, जेठ ६ गते बिहान ८:५७ बजे ल्होत्से (८५१६ मि) आरोहण गर्दै २४ घण्टाभित्र दुई ८,००० मिटरभन्दा अग्ला हिमाल चढ्ने दुर्लभ कीर्तिमान कायम गरेकी छिन्।
‘डबल ८००० मिटर’ आरोहणमा कबिता नेपालीको ऐतिहासिक सफलता
कबिता नेपाली, जसले आफ्नो अभिनय यात्रा फिल्म ‘अलोन’ बाट सुरु गरेकी थिइन्, अब पहिलो नेपाली सेलिब्रिटी बनेकी छिन् जसले सगरमाथा-ल्होत्से ट्राभर्स सफलतापूर्वक सम्पन्न गरेकी छिन्। यो कठिन यात्रा Elite Exped को नेतृत्वमा सम्पन्न भएको थियो, जसमा विश्व कीर्तिमानी आरोही मिङ्मा डेविड शेर्पा पनि सहभागी थिए।
कबिता नेपालीले आफ्नो फेसबुकमा लेखेकी छिन्, “यो यात्रा केवल शिखर चुम्नका लागि थिएन। यो सपना देख्नेहरू, गर्नेहरू र आफ्नो सीमा माथि उठ्नेहरूका लागि हो। मैले यो हिमाल जितेकी होइन, म यसबाट ठूलो भएकी छु। मैले आफूलाई चिनेँ, सिकेँ, र आफैभित्र हराएका टुक्राहरू फेला पारें।”
कबिता नेपालीको यो सफलता केवल व्यक्तिगत विजय मात्र नभई, नेपाली महिलाहरूको पर्वतारोहणमा अग्रणी भूमिका पुष्टि गर्ने अर्को प्रेरणादायक अध्याय हो। उनले देखाइन् कि दृढ इच्छाशक्ति, तयारी, र साहसले असम्भव जस्तो लाग्ने लक्ष्यहरू पनि सम्भव छन्।
