काठमाडौं। एसिया तथा प्रशान्त क्षेत्रमा सामाजिक सुरक्षाको दायराबाहिर रहेका आधाभन्दा बढी श्रमिकलाई सामाजिक सुरक्षा दायरामा ल्याउन आह्वान गरिएको छ । अन्तर्राष्ट्रिय श्रम संगठन(आईएलओ)का अनुसार अरब क्षेत्रमा ६० प्रतिशत र एसिया तथा प्रशान्त क्षेत्रमा ५० प्रतिशत मानिस सामाजिक सुरक्षाको दायराभित्र रहेका छन् ।
सिंगापुरमा आजदेखि सुरु भएको आईएलओको १७ औं एसिया तथा प्रशान्त क्षेत्रीय बैठकमा यस्तो आह्वान गरिएको हो । २०१६ मा इन्डोनेसियापछि भएको क्षेत्रीय बैठकमा सहभागी हुनकालागि एसिया, प्रशान्त र अरब क्षेत्रका ४८ देशका १९ जना श्रम मन्त्री, सचिव, ट्रे्ड युनियन र रोजगारदाता गरी ५ सय जनाको सहभागिता छ । यो बैठक चार वर्षपछि भएको हो ।
नेपालका तर्फबाट श्रम सचिव एकनारायण अर्यालको नेतृत्वमा प्रतिनिधिमण्डल सहभागी छ । बैठकलाई सम्बोधन गर्दै सिंगापुरकी राष्ट्रपति हलिमा याकुबले कोरोनापछि बिग्रिएको अर्थतन्त्रलाई सुधार गर्नका लागि आ-आफ्नो विकास मोडलप्रति पुनर्विचार गर्नुपर्ने बताईन्।
बैठकमा आईएलओका महानिर्देशक गिलवर्ट एफ. होङबोले कोरोना महामारीले राजनैतिक, आर्थिक र जलवायु संकटले एसिया क्षेत्रको सामाजिक प्रगतिलाई निकै पछाडि धकालिदिएको बताए।
