असार ७/
यात्रुवाहक बसको ठक्करबाट झापाको मेचीनगरमा आज एक पैदलयात्रीको मृत्यु भएको छ । मृत्यु हुनेमा मेचीनगर नगरपालिका ९ बस्ने अन्दाजी ६५ वर्षीय घनश्याम गडतौला रहेको प्रहरीले जनाएको छ ।
प्रहरी कार्यालय झापाका प्रहरी नायव उपरीक्षक (डिएसपी) महेन्द्रकुमार श्रेष्ठका अनुसार पूर्व–पश्चिम राजमार्ग अन्तरगत काँकडभिट्टाबाट धरानतर्फ जान आइरहेको को १ ख ७६६५ नम्बरको नारायणी यातायातले मेचीनगर १० स्थित नगडुब्बा पुल नजिकै पैदलयात्री गड्तौलालाई आज दिउँसो २ बजे ठक्कर दिएको थियो ।
श्रीमती इन्द्रमायासँगै सडकमा हिँडिरहेका घनश्यामलाई बसले ठक्कर दिँदा उहाँको घटनास्थलमै मृत्यु भएको डिएसपी श्रेष्ठले जानकारी दिनुभयो । चारआली प्रहरी चौकीले ठक्कर दिने बस र चालकलाई नियन्त्रणमा लिएको छ ।
यता झापाको कमल गाँउपालिका ५ स्थित पाडाजुगी – गौरादह सडक खण्ड अन्तर्गत मंगलबारेमा आज दिउँसो बुलेरो जिप र मोटरसाइकल जुध्दा एक जना घाईते भएका छन् । दुर्घटनामा परि मोटरसाइकल चालक गौरादह ४ का ३८ बर्षिय धर्मराज पौडेल घाईते भएको ट्राफिक प्रहरी कार्यालय दमकले जनाएको छ ।
दिउँसो २ वजेतिर पाडाजुंगी देखी गौरादहतर्फ जादै गरेको बुलेरोले विपरीत दिसाबाट आउदै गरेको को.६ प. ८८३८ नम्बरको मोटरसाईकललाई ठक्कर दिदाँ मोटरसाइकल चालक पौडेल सख्त घाईते हुनु भएको प्रहरी नायव निरीक्षक दधिराम दाहालले जानकारी दिनुभयो । घाईते पौडेलको टाउको र खुट्टामा चोट लागेको छ ।
घाइतेको दमकस्थित लाइफलाइन अस्पतालमा उपचार हुन नसकेपछि न्युरो अस्पताल बिराटनगर लगेर थप उपचार भैरहेको प्रहरी नायव निरिक्षक दाहालले बताउनु भयो । दुर्घटनामा संलग्न दुवै सवारी नियन्त्रणमा रहेको प्रहरीले जनाएको छ ।
