अर्जुन प्रधान, ग्लोबलपोस्ट
भर्जिनिया, अमेरिका
संयुक्त राज्य अमेरिकाको भर्जिनियास्थित मनासास पार्क मा एक नेपाली परिवारका चार सदस्य मृत फेला परेका छन्। प्रहरीले घटनालाई सम्भावित हत्या-आत्महत्या को रूपमा अनुसन्धान गरिरहेको जनाएको छ।
जुन ६, २०२५, बिहीबार साँझ सन्तोष परियार (३८), अञ्जु श्रेष्ठ (३६) र तिनका दुई नाबालक सन्तान—८ वर्षीया छोरी र २ वर्षीय छोरा—आफ्नो अपार्टमेन्टभित्र मृत अवस्थामा भेटिएका हुन्। प्रहरीका अनुसार घटनास्थलमा गोली प्रहार भएको पुष्टि भएको छ र एक थान हतियार बरामद गरिएको छ।
यो परिवार केही समयअघि मात्रै नेपालबाट अमेरिका आएका थिए। उनीहरूले मनासास पार्कको लाने लेन मा अपार्टमेन्ट भाडामा लिएका थिए।
स्थानीय प्रहरीले घटनास्थलमा पुग्दा चारै जनाको मृत्यु भइसकेको पुष्टि गरेको छ। प्रारम्भिक अनुसन्धानअनुसार घटना हत्या-आत्महत्याको सम्भावना रहेको जनाइएको छ। विस्तृत अनुसन्धान भने अझै जारी छ।
यस घटनापछि स्थानीय नेपाली समुदायमा गहिरो शोक छाएको छ। मृतक दम्पतीकी छोरी मनासास पार्क सिटी स्कूल्स मा अध्ययनरत थिइन्। विद्यालय प्रशासनले विद्यार्थी तथा परिवारजनका लागि परामर्श सेवा उपलब्ध गराएको जनाएको छ।
छिमेकीहरूका अनुसार परियार-श्रेष्ठ परिवार दयालु, सहयोगी र परिवारप्रेमी थिए। साना बालबालिकाहरू छिमेकमा रमाउँदै खेल्ने गर्थे, जसको हाँसो र खुसी अहिले पनि छिमेकभरि गुञ्जिरहेजस्तो महसुस गरिएको छ।
यस दुःखद घडीमा परिवारको अन्त्येष्टि, कानुनी प्रक्रिया र नेपालबाट अमेरिका आउने आवश्यक व्यवस्थापन का लागि NRNA भर्जिनिया च्याप्टर द्वारा GoFundMe अभियान सुरु गरिएको छ।
अभियानले ५०,००० अमेरिकी डलर संकलन गर्ने लक्ष्य राखेको छ भने हालसम्म ५,००० डलर भन्दा बढी रकम संकलन भइसकेको छ।
नेपालमा रहेका सन्तोष र अञ्जुका आफन्तहरू अमेरिका आउने भिसा प्रक्रिया अगाडि बढाइरहेका छन् ताकि परम्परागत अन्त्येष्टि गर्न सकियोस्।
GoFundMe पेज अनुसार संकलित रकम निम्न प्रयोजनका लागि खर्च गरिनेछ:
- सम्पूर्ण परिवारको अन्त्येष्टि तथा श्रद्धाञ्जली खर्च
- आवश्यक कानुनी तथा प्रशासनिक प्रक्रिया
- नेपालबाट अमेरिका आउने परिवारजनको यात्रा तथा व्यवस्थापन
समुदायले यो परिवारलाई “शान्तिप्रिय, परिवारप्रेमी र भविष्यप्रति समर्पित” भन्दै श्रद्धाञ्जली अर्पण गरेको छ।
सहयोग गर्न चाहनुहुन्छ?
GoFundMe आधिकारिक पेज: Support for the Pariyar-Shrestha Family
तपाईंको स्नेह, सहयोग र प्रार्थना यस शोकपूर्ण घडीमा परिवारका लागि अमूल्य हुनेछ।
