काठमाडौं – सिरि ए फुटबलमा शीर्ष स्थानको युभेन्ट्स हारबाट जोगिएको छ ।
ससुओलोको घरेलु मैदानमा बुधबार राति भएको खेलमा युभेन्टसले ३-३ गोलको बराबरी खेल्दै अंक बाँडेको छ । खेलको सुरुवातमा लिएको २–० को अग्रतालाई जोगाउन नसक्दा युभेन्ट्स अंक बाढ्न बाध्य भएको हो । छैटौँ मिनेटमा ड्यानिलोले युभेन्ट्सलाई अग्रता दिलाएका थिए ।
१२ औं मिनेटमा गोन्जालो हिगुएनले युभेन्ट्सको अग्रता दोब्बर बनाएका थिए । तर घरेलु टोलीका फिलिप ज्यूरिकले २९औं मिनेटमा खेल २–१ मा झारे । डोमनिको बर्दीले ५१औं मिनेटमा खेल बराबरीमा ल्याए ।
त्यसको तीन मिनेटपछि फ्रान्सेस्को कैपुटोले घरेलु टोलीलाई ३–२ को अग्रता दिलाएका थिए । युभेन्ट्सका एलेक्स सान्ड्राले ६४औं मिनेटमा हेडमार्फत गोल गर्दै खेल ३–३ को बराबरीमा ल्याएका थिए ।
बराबरीको नतिजासंगै युभेन्ट्सले लिगमा ७ अंकको अग्रता कायम राखेको छ । युभेन्ट्स पछिल्ला तीन खेलमा जीत निकाल्न असफल छ । उसले ९ गोल भने गरेको छ । बराबरीसँगै ससुओलो ४७ अंकसहित आठौं स्थानमा यथावत छ ।
